ศิริพงศ์ วงศ์ไชย
ป่าเปา สันกำแพง
สวัสดี ท่านที่เคารพ ผมขอน้อมนบ ปรารภค่าวสาร
ในโอกาสนี้ ขอจี้ไขก๋าร เป๋นเรื่องนิทาน หื้ออ่านกั๋นเล่น
ขึ้นชื่อเรื่องมา นับว่าตื่นเต้น แป๋งใจ๋เย็นเย็น เอาไว้
ลองค่อยอ่านดู จักฮู้แน่ไซร้ ว่าเรื่องเกิดได้ อย่างใด
มีวันหนึ่งนั้น อกสั่นหวั่นไหว เพราะมีเลศนัย เรื่องได้เกิดขึ้น
จะขอไขจ๋า เนื้อหาลึกตื้น เรื่องเกิดเมื่อคืน หนึ่งนั้น
อวัยวะร่างก๋าย แบ่งสายแบ่งจั๊น ต่างก็อวดขั้น ปั๋ญญา
ว่าตั๋วข้านั้น สำคัญนักหนา ทุกส่วนนั้นนา สู้ข้าบ่ได้
ในส่วนของมือ หยุบถือไกล๋ใกล้ ต้องก๋ารสิ่งใด ได้พร้อม
ใจ๊ได้จ้าดดี บ่มีอ้อมค้อม ก๋ำจ๊อนก๋ำส้อม วางจาน
มือว่าข้านี้ พร้อมที่ประสาน ต้องเป๋นประธาน ทุกท่านแม่นหมั้น
ในส่วนของต๋า อู้จ๋าสั้นสั้น ว่าข้าสำคัญ ยิ่งนัก
ผ่อใกล้ผ่อไกล๋ หันไผเอิ้นตั๊ก เป็นหลักอยู่ได้ ตึงวัน
ถ้าขาดข้านี้ จักมีไผหัน ประธานนั้นมัน ต้องปั๋นหื้อข้า
ในส่วนสมอง ขอจองล่วงหน้า ตำแหน่งนั้นมา ขอไว้
เพราะความสำคัญ ตึงวันนี้ไซร้ ตั๋วข้านี้ได้ ทำแตน
ก๋ารงานใหญ่น้อย ข้าคอยวางแผน มีแบบมีแปลน สุดแสนยากใบ้
ประธานนั้นหนา ตั๋วข้าต้องได้ อย่าหื้อคนใด แย่งยื้อ
ส่วนตี๋นนั้นหนา ว่าข้าขอตื้อ ก่อนที่จะหื้อ คนใด
ว่าตั๋วข้านี้ มีดีกว่าไผ สองตี๋นเตียวไป ถึงไหนถึงหั้น
บ่ว่าใกล้ไกล๋ ข้าไปสอดดั้น นับว่าสำคัญ บ่น้อย
ส่วนปากนั้นหนา อู้จ๋าเรียบร้อย ว่าข้าบ่ด้อย เลยนา
ตั๋วข้านี้ไซร้ เคยได้อู้จ๋า เรื่องราวนานา ปรึกษาฟู่อู้
ตำแหน่งประธาน ขอค้านขอสู้ ช่วยกั๋นคิดดู พี่น้อง
ส่วนทวารหนัก เอิ้นตั๊กขอร้อง มันบ่ถูกต้อง สักอัน
ส่วนตั๋วข้านี้ ขอจี๊ไขปั๋น เรื่องความสำคัญ ยืนยันอยู่เฝ้า
ว่าข้านี้นา ใหญ่กว่าสูเจ้า สำคัญบ่เบา เรื่องนี้
หมู่นั้นลืมตั๋ว ใคร่หัวร้องยี้ “ฮู ข...สระอี้” นั้นกา
น่าใคร่หัวล้ำ อยู่ต่ำนักหนา ดีมอกใดจา หยังมาขี้อู้
ส่วนทวารหนัก เลยดักบ่สู้ ลองประท้วงดู ซักครั้ง
เมินนานสามวัน อดกลั้นยอบยั้ง บ่ถ่ายสักตั้ง สักวัน
ทำหื้อฮึดฮัด เกิดอัศจ๋รรย์ ร่างก๋ายทุกอัน ปากั๋นยอมเสี้ยง
ทุกฝ่ายยอมถอน โอนอ่อนหมดเกลี้ยง ขอหื้อแค่เพียง รอดไว้
ยกเป๋นประธาน ยอมก๊านแต๊ไซร้ ทุกส่วนฮู้ได้ ทันที
นับตั้งแต่นั้น ผูกพันบ่หนี เลยสามัคคี ทำดีทุกด้าน
ช่วยเหลือกั๋นดี บ่มีต่อต้าน หน้าที่ก๋ารงาน เรียบร้อย
ถ้าจะเทียบเอา หมู่เฮาใหญ่น้อย ถ้าร่วมเกี่ยวก้อย กั๋นเดิน
ก๋ารงานทุกนัด บ่ขัดบ่เขิน มีความเจริญ เพลิดเพลินเสี้ยงถ้าน
บ่ว่างานไหน ใกล้ไกล๋ทุกด้าน สำเร็จทุกงาน ยิ่งล้ำ
ถ้าเฮาช่วยกั๋น ผูกพันเตื่อมก๊ำ จะดีทุกก้ำ ทุกปาย
กล๋อนบรรยาย ขยายเท่าอี้ เท่านี้ลวดวางลง ก่อนแหล่นายเฮย
